ເມືອງຄູນຄໍາ ໄດ້ຮັບການສ້າງຕັ້ງໃຫ້ເປັນເມືອງອັນດັບທີ 10 ຂອງແຂວງຄໍາມ່ວນ, ໂດຍແຍກອອກຈາກເມືອງຫີນບູນ. ພິທີປະກາດສ້າງຕັ້ງ ເມືອງໃໜ່ໄດ້ຈັດຂື້ນຢ່າງເປັນທາງການໃນວັນທີ 22 ກໍລະກົດ 2011, ພາຍໃຕ້ການເປັນປະທານຂອງ ທ່ານ ຄໍາໃບ ດໍາລັດ, ເລຂາຄະນະບໍລິຫານງານພັກແຂວງ, ເຈົ້າແຂວງໆຄໍາມ່ວນ. ເມືອງຄູນຄໍາມີຊາຍແດນທາງທິດເໜືອຕິດກັບເມືອງປາກກະດິງ ແລະ ເມຶອງຄໍາເກີດ, ແຂວງຄໍາມ່ວນ ມີລວງຍາວປະມານ 55 ກມ, ທິດໃຕ້ຕິດກັບເມືອງຫີນບູນ, ທິດຕາເວັນອອກຕິດກັບເມືອງນາກາຍ ມີລວງຍາວປະມານ 25 ກມ ແລະ ທິດຕາເວັນຕົກຕິດກັບເມືອງປາກກະດິງ, ແຂວງບໍລິຄໍາໄຊ ຫ່າງຈາກສໍານັກເມືອງໃໜ່ປະມານ 30 ກມ ທາງອາກາດ, ເມືອງຄຸນຄໍາມີເນື້ອທີ່ທັງໜົດປະມານ 995,60 ກິໂລແມັດ, ປະຊາກອນ 18,954 ຄົນ, ມີເຜົ່າລາວ ແລະ ເຜົ່າມະກອງ ສະເລ່ຍຄວາມໜ້າແໜ້ນຂອງພົນລະເມືອງມີ 6 ຄົນ ຕໍ່ໜື່ງກິໂລຕາແມັດ, ການປົກຄອງມີ 37 ບ້ານ ແລະ ແບ່ງອອກເປັນ 3 ກຸ່ມ ແລະ 2 ບ້ານໃຫ່ຍ, ສໍານັກງານປົກຄອງເມືອງຄູນຄໍາຕັ້ງຢູ່ບ້ານຄຸນຄໍາ 3 ແຍກທາງໄປກອງລໍແຄມທາງເລກ 8 ອາ, ແລະ ຫ່າງຈາກສໍານັກງານປົກຄອງເມືອງຫີນບູນໄປທາງທິດເໜືອປະມານ 132 ກິໂລແມ້ດ. ເສັ້ນທາງແມ່ມີ 2 ເສັ້ນ ຄືທາງປູຢາງເລກ 8 ອາ ທີ່ເປັນເສັ້ນທາງທີ່ຜ່າຈຸດໃຈກາງເມືອງ ແລະ ນັບແຕ່ຈຸດທີ່ຕັ້ງສໍານັກປົກຄອງເມືອງໄປເຖິງຖໍ້າກອງລໍມີທາງປຸຢາງ ຫຼື ແຕ່ທາງເລກທີ່ 8 ອາຍາວ 42 ກິໂລແມັດ.

 

   

    ເມືອງຄູນຄໍາເປັນເມືອງທີ່ມີລັກສະນະເປັນ ທົ່ງພຽງຢຽດຍາວຕາມຮ່ອມພູດ້ານລຸ່ມຂອງສາຍພູໄຮລຽບ, ຕາມສາຍນໍ້າຫີນທີ່ໄຫຼອອກຈາກຖໍ້າກອງລໍ ແລະ ມີສາຍນໍ້າໄຮທີ່ໄຫຼຕະຫຼອດປີ. ພື້ນທີ່ດິນຕິນພຸໄຮຄ້ອຍລົງມາໃສ່ນໍ້າໄຮ ແລະ ນໍ້າຫີນບູນເປັນບ່ອນທໍາມາຫາກິນຂອງປະຊາຊົນເຂດນີ້ຕັ້ງແຕ່ດຶກດໍາບັນ. ສ່ວນເນື້ອທີ່ລຽບຕາມສາຍນໍ້າຫີນບູນ ແລະ ນໍ້າໄຮກາຍເປັນບ່ອນລຽ້ງສັດ ແລະ ປູກພືດເປັນສິນຄ້າ.

    ເມືອງຄູນຄໍາມີທ່າແຮງໃນການພັດທະນາເສດຖະກິດ ຍ້ອນມີທີຕັ້ງ ພູມສັນຖານ ແລະ ຊັບພະຍາກອນທີ່ອຸດົມສົມບູນ, ໂດຍສະເພາະພື້ນທີ່ນີ້ມີທ່າແຮງສໍາຄັນໃຫ້ແກ່ການຜະລິດກະສິກໍາ-ອຸດສາຫະກໍາ-ພະລັງງານໄຟຟ້າ ແລະ ການບໍລິການ, ເມືອງຄູນຄໍາມີເນື້ອທີ່ປ່າສະຫງວນແຫ່ງຊາດ, ນໍ້າເທີນ-ນາກາຍ, ພູຫີນປູນ, ນໍ້າກະດິງ ແລະ ພູຫິນໜາມໜໍ່ ແລະ ນໍ້າກະດິງກວມທັງໜົດ 84,433 ເຮັກຕາ, ປັດຈຸບັນນີ້, ໂຮງໄຟຟ້ານໍ້າເທີນ-ຫີນບູນມີກໍາລັງຜະລິດໄຟຟ້າໄດ້ 210 ກິໂລວັດ ແລະ ຈະຂະຫຍາຍເປັນ 500 ເມກາວັດ ສໍາເລັດໃນປີ 2012-2013 , ລາຍໄດ້ສະເລ່ຍຂອງຄົນພາຍໃນເມືອງຄູນຄໍາແມ່ນ 590 ໂດລາສະຫະລັດຕໍ່ຄົນຕໍ່ປີ.

    ເມືອງຄູນຄໍາທີ່ອໍານວຍຄວາມສະດວກໃນການຄົມມະນາຄົມທ່ອງທ່ຽວ, ຂົນສົ່ງສິນຄ້າ ແລະ ເຮັດການບໍລິການໄດ້ດີທີ່ສຸດ. ເມືອງຄູນຄໍາມີຄວາມພ້ອມສໍາລັບການທ່ອງທ່ຽວເພາະມີບ້ານພັກ 50 ແຫ່ງ ແລະ ກິນດື່ມພຽງພໍ ເພື່ອຮອງຮັບແຂກທີ່ມາທ່ອງທ່ຽວຊົມຖໍ້າກອງລໍ, ຫີນໝາມໜໍ່ ແລະ ປ່າສະຫງວນແຫ່ງຊາດພຸຫີນປູນ-ນໍ້າເທີນນາກາຍ. ພົນລະເມືອງເກືອບທັງໜົດນັບຖືສາສະໜາພຸດ ສະນັ້ນ ທົ່ວເມືອງຈື່ງມີວັດ 37ແຫ່ງ ແລະ ປະຊາຊົນຍັງປົກປັກຮັກສາ ແລະ ສົ່ງເສີມສິລະປະວັດທະນະທໍາຂອງເຜົ່າພົງພັນຕົນເອງຢ່າງດີ.

 

      ເມືອງໄຊບົວທອງເປັນເມືອງໜຶ່ງທີ່ຂຶ້ນກັບແຂວງຄຳມ່ວນ ຕັ້ງຢູ່ຫ່າງຈາກເທດສະບານແຂວງໄປທາງທິດຕາເວັນອອກສ່ຽງໃຕ້ ປະມານ 96 ກິໂລແມັດ, ມີເນື້ອທີ່ທັງໝົດ 913 ກິໂລຕາແມັດ, ຄວາມໜາແໜ້ນຂອງປະຊາກອນປະມານ 28 ຄົນຕໍ່ກິໂລຕາແມັດ, ມີເຂດເຊື່ອມຕໍ່ຕິດຈອດກັນ ດັ່ງນີ້: ທິດເໜືອຕິດກັບເມືອງມະຫາໄຊ,ທິດໃຕ້ຕິດກັບ ເມືອງອາດສະພອນ ແຂວງສະຫວັນນະເຂດ, ທິດຕາເວັນອອກຕິດກັບເມືອງບົວລະພາ, ເມືອງວິລະບູລີ ແຂວງສະຫວັນນະເຂດ; ທິດຕາເວັນຕົກຕິດກັບເມືອງເຊບັ້ງໄຟ, ເປັນເມືອງທົ່ງພຽງມີຟູຜາປ່າດົງປົກຄຸມໄປດ້ວຍທຳມະຊາດທີ່ຕຶບໜາ, ເປັນແຫຼ່ງກຳເນີດຂອງສາຍນ້ຳຕ່າງໆເປັນຕົ້ນແມ່ນສາຍນ້ຳເຊນ້ອຍ, ເຊນ້ຳກະປໍ, ນ້ຳປຽດ ແລະຫ້ວຍຮ່ອງໜອງບຶງ, ເປັນເຂດທີ່ມີອາກາດ ແລະພື້ນທີ່ອຸດົມສົມບູນ,

 

     

      ປະລິມານນໍ້າຝົນເໝາະສົມ​ໃຫ້​ແກ່​ການ​ປູກພືດປະ​ເພດ​ຕ່າງໆ ເຊິ່ງເປັນເງື່ອນໄຂເອື້ອອຳນວຍໃຫ້ແກ່ການຜະລິດກະສິກຳ ແລະ ຫັດຖະກຳເພື່ອເປັນສິນຄ້າ,  ການນຳໃຊ້ເນື້ອທີ່ດິນແຕ່ລະປະເພດມີທັງໝົດ 66.994 ເຮັກຕາ, ໃນນີ້ເນື້ອທີ່ປ່າໄມ້ຊະນິດຕ່າງໆ ມີ 57.948 ເຮັກຕາ (ປ່າຜະລິດ, ປ່າປ້ອງກັນ ແລະ ປ່າປະສົມ), ເນື້ອທີ່ປຸກສ້າງຕ່າງໆມີ 718,98 ເຮັກຕາ,ດີນຜະລິດກະສິກຳຕ່າງໆ ມີ 18.565 ເຮັກຕາ ແລະ ອື່ນໆ).

        ເມືອງໄຊບົວທອງ ປະຈຸບັນມີ 6 ກຸ່ມບ້ານ, ມີ 01 ບ້ານໃຫຍ່ຂຶ້ນກັບເມືອງ, ມີປະຊາກອນທັງໜົດ 26.019 ຄົນ,ຍີງ 13.039 ຄົນຖ້າທຽບໃສ່ປີ 2009 ​ເພີ້ມຂື້ນ 3.915 ຄົນເທົ່າ​ກັບ:  17,69%; ມີ 4.896 ຄອບຄົວ​ (ເພີ້​ມຂື້ນ 634 ຄອບຄົວ ​ເທົ່າ​ກັບ: 14,88% )  ປະກອບ​ດ້ວຍ 02 ​​ເຜົ່າ​ຄື:  ເຜົ່າຜູ້ໄທ ກວມເອົາ 83,13 % ແລະ ​ເຜົ່າ​ມະກອງ ມີ 16,87 %

     ພະທາດສີໂຄດຕະບອງ(ແຂວງຄໍາມ່ວນ)

 

 

        ພະທາດສີໂຄດຕະບອງ ຕັ້ງຢູ່ບ້ານສີໂຄດ ແຄມຝັ່ງແມ່ນໍ້າຂອງໃນວັດເກົ່າ ເຊິ່ງບໍລິເວນນີ້ ເຄີຍເປັນໃຈກາງຂອງອະດີດ ເມືອງຫຼວງທີ່ເກົ່າແກ່ຂອງອານາຈັກລ້ານຊ້າງ. ຕາມທາງເລກທີ 13 ໃຕ້ຫ່າງຈາກເມືອງທ່າແຂກ 6 ກິໂລແມັດ. ເສດຕະສັດ 7 ຊັ້ນ ໃນແກນເປັນເຫຼັກ, ເສດຕະສັດເຮັດ ດ້ວຍ ເງິນ ແລະ ຄໍາ, ປາຍເສດຕະສັດມີໂຄມແກ້ວ (ສະເພາະເສດຕະສັດສູງ 2 ແມັດ), ບໍລິເວນຕີນພະທາດ ກ້ວາງດ້ານລະ 25 ແມັດ, ສູງ 30 ແມັດ). ພະທາດ​ນີ້ ສ້າງຂຶ້ນໃນສະໄໝອານາຈັກສີໂຄດຕະບອງລະຫວ່າງສັດຕະວັດທີ VI–VIII. ພະທາດໜ່ວຍນີ້ເປັນ ບ່ອນບັນຈຸກະດູກອັດ ຖິຂອງພະ​ພຸດທະເຈົ້າ ໃນສັດຕະວັດ ທີ VI. ໃນນີ້ຍັງມີຮູບປັ້ນຂອງພະຍາສີໂຄດຕະບອງຢືນຢ່າງສະຫງ່າລາສີ. ພົງສາວະດານ ກ່າວເຖິງພະທາດ ໜ່ວຍນີ້ວ່າ:ໃນ ສັດຕະວັດທີ XVI, ເຊິ່ງເປັນ​ໄລຍະທີ່ອານາຈັກລ້ານຊ້າງຄອບຄອງແຖບນີ້, ພຸດທະສາສະໜານິກາຍຫິນະຍານໄດ້ແຜ່ອິດທິພົ​ນເຂົ້າມາໃນຂົງເຂດ​​ນີ້ແລະເຈົ້າຊີວິດໃນສັດຕະວັດທີ່16 (ຄ.ສ 15201-1747ໄດ້ສັ່ງໃຫ້ມີການບູລະນະພະທາດ).

        ໃນ ຄ.ສ 1539, ການປະຕິສັງຂອນເປັນແບບສິລະປະລ້ານຊ້າງໂດຍເພີ່ມແບບປະຕິມະກຳທີ່ຕິດດອກບົວໃສ່ ຈອມທາດ. ໃນຍຸກສະໄໜຂອງພະເຈົ້າໄຊຍະເສດຖາທິລາດ ພະອົງໄດ້ບູລະນະຈົນເປັນແບບດັ່ງທີ່ເຫັນໃນປະຈຸບັນນີ້. ມາເຖິງປີ ຄ.ສ 1806. ຕໍ່ ມາ,ໃນສະໄໝການປົກຄອງຂອງເຈົ້າ ອານຸວົງ ພະທາດໜ່ວຍນີ້ກໍ່ໄດ້ຮັບໄພ ແລະ ການທໍາລາຍຈາກສົງຄາມຈົນຖືກປ່ອຍປະລະໃຫ້ພະທາດສີໂຄດເສົ້າໝອງ ຢ່າງສິ້ນເຊີງ.​ ໃນສະໄໝ ທີ່ຝຣັ່ງຄອບຄອງອິນດູຈີນ ໃນປີຄ.ສ 1893 ຫາ 1949, ປະຊາຊົນຄໍາມ່ວນ ໄດ້ຮ່ວມກັນສ້າງວິຫານ ໃສ່ດ້ານເໜືອຂອງພະທາດແລ້ວກໍ່ນິມົນເອົາພະພິກຂຸສົງ ມາຈໍາວັດຕະຫຼອດມາ. ພາຍຫຼັງປະກາດເອກະລາດລາວ ໃນວັນ ທີ່ 12 ຕຸລາ 1945, ຊາວພຸດກໍ່ໄດ້ພາກັນບູລະນະພະທາດໜ່ວຍນີ້ດ້ວຍຄວາມສັດທາເຫຼື້ອມໃສ. ໃນປີ 1950 ປະຊາຊົນລາວ ເຊິ່ງດໍາລົງຊີວິດໃນບ້ານ ແລະ ເມືອງທີ່ຢູ່ອ້ອມແອ້ມພະ ທາດສີໂຄດຕະບອງໄດ້ພາກັນມາຖາກຖາງ, ອະນາໄມເຄືອໄມ້ໃບຫຍ້າ ແລະ ຂູດໂໝກສີດຳອອກ. ຖັດນັ້ນມາ, ຫຼາຍສິ່ງ ຫຼາຍຢ່າງ ອ້ອມຂ້າງພະທາດໄດ້ຮັບການກໍ່ສ້າງຄືນໃໝ່ ໂດຍສະ ເພາະແມ່ນ “ສິມ” ໃນຊຸມປີ 1970 ແລະ ມີພະໃຫ່ຍອົງພະປະທານສະຖິດຢູ່​ພາຍໃນໄວ້ໃຫ້ຄົນສັກກາລະບູຊາ. ໃນຊຸມປີ 2010, ເພີ່ນໄດ້ສ້າງຮູບປັ້ນພະຍາສີໂຄດຕະບອງ ທີ່ຢືນຢ່າງ ສະຫງ່າຜ່າເຜີຍໃນບໍລິເວນເດີ່ນພະທາດນີ້. ປະຈຸບັນ​ນີ້, ພະທາດສີໂຄດຕະບອງເປັນປູສະນີຍະສະຖານ ແລະ ກາຍເປັນສັນຍາລັກຂອງແຂວງ. “ຄົນທີ່ເດີນທາງໄປ ແຂວງ ຄຳມ່ວນ ບໍ່ໄດ້ ໄປກາບໄຫ້ວພະທາດສີໂຄດຕະບອງຖືວ່າບໍ່ໄດ້ໄປຮອດ, ໄປເຖິງແຂວງຄຳມ່ວນ”.​​​​

      ເມືອງຍົມ​ມະ​ລາດຕັ້ງ​ຢູ່​ທາງ​ທິດຕາ​ເວັນ​ອອກ​ສ່ຽງ​ເໜືອຂອງ​ແຂວງຄຳ​ມ່ວນ ຫ່າງ​ຈາກ​ເທດສະ​ບານແຂວງ   54 ກິ​ໂລ​ແມັດ, ມີ​​ເຂດ​ແດນ​ຕິດ​ຈອດ​ກັບ 5 ຕົວ​ເມືອງມີ ເມືອງ ທ່າແຂກ, ເມືອງ ຫີນບູນ ,ເມືອງ ມະຫາໄຊ ,ເມືອງ ບົວລະພາ, ເມືອງ ນາກາຍ ມີເນື້ອທີ່ທັງໝົດ 120.914 ​ເຮັກຕາ  ແລະ ຍັງເປັນເມືອງພື້ນຖານການປະຕິວັດ, ປະຊາຊົນບັນດາເຜົ່າມີມູນເຊື້ອອົງອາດກ້າແກ່ນ, ມີຄວາມຮັກເຊື້ອແພງຊາດ ຍອມເສຍສະຫຼະເລືອດເນື້ອເພື່ອຊາດ, ເພື່ອການປະຕິວັດຈົນໄດ້ຮັບໄຊຊະນະຢ່າງສະຫງ່າຜ່າເຜີຍ.

 

   

      ເມືອງຍົມມະລາດ ມີພົນລະ​ເມືອງ​ 33.959 ຄົນ; ຍິງ 17.107 ຄົນ, ມີ 4 ເຜົ່າຢູ່ຮ່ວມກັນ ຄື: ເຜົ່າລາວ 54%, ເຜົ່າມະກອງ 37%, ເຜົ່າຜູ້ໄທ 6% ແລະ ເຜົ່າແສກ 3% ຂອງຈຳນວນພົນລະເມືອງ, ມີ 3 ກຸ່ມບ້ານ, ມີ 46 ບ້ານ, ມີ 7.401 ຄອບຄົວ​ ແລະ 6.780 ຫຼັງຄາເຮືອນ.

 ແຜນທີ່ແຂວງຄໍາມ່ວນ.

 

       

     ແຂວງຄໍາມ່ວນ ຕັ້ງຢູ່ພາກກາງຂອງປະເທດ, ທິດຕາເວັນອອກຕິດກັບແຂວງກວາງບິ່ງ ແລະ ແຂວງຮ່າຕິງ ສສ ຫວຽດນາມ, ທິດຕາເວັນຕົກຕິດກັບຣາຊະອານາຈັກໄທ, ທິດເໜືອຕິດກັບແຂວງບໍລິຄໍາໄຊ, ທິດໃຕ້ຕິດກັບແຂວງສະຫວັນນະເຂດ. ມີເນື້ອທີ່ທັງຫມົດ 16.315 ກິໂລຕາແມັດ, ມີ 10 ເມືອງ, ມີ 574 ບ້ານ, ມີ 79.617 ຄອບຄົວ, ມີພົນລະເມືອງ  409.088 ຄົນ, ຍິງ 206.514 ຄົນ, ກໍານົດເປັນ 2 ເຂດນິເວດ ວິທະຍາຄື: ເຂດພູດອຍ ກວມເອົາ 53,7% ຂອງເນື້ອທີ່ທັງໝົດ, ມີພົນລະເມືອງອາໃສຢູ່ 28% ເຂດນີ້ເປັນເຂດພື້ນຖານການປະຕິວັດ ເປັນຕົ້ນ ເມືອງບົວລະພາ, ນາກາຍ ແລະ ເມືອງໄຊບົວທອງ ແຕ່ການຄົມມະນາຄົມຍັງມີຄວາມຫຍຸ້ງຍາກ ໂດຍສະເພາະລະຫວ່າງບ້ານທີ່ຢູ່ຫ່າງໄກອອກໄປຈາກຕົວເມືອງ, ເຂດທົ່ງພຽງ ກວມເອົາ 46,3% ມີປະຊາກອນອາໃສຢູ່ 72 % ເຂດນີ້ເໝາະແກ່ການປູກຝັງ-ລ້ຽງສັດ ແລະ ຊີວິດການເປັນຢູ່ແມ່ນໄດ້ຮັບການພັດທະນາດີກວ່າເຂດພູດອຍ.

ວິດີໂອ

ເວັບໄຊຕ່າງໆ

                     ເວັບໄຊອື່ນໆ

ຮູບພາບ

ສະຖານທີ່ທ່ອງທ່ຽວຂອງແຂວງ

ສະຖານທີ່ທ່ອງທ່ຽວທາດເມືອງເກົ່າ
ສະຖານທີ່ທ່ອງທຽວຂຸນກອງແລ
ແຄມຂອງຍາມແລງເມືອງທ່າແຂກ
ສະຖານທີ່ທ່ອງທ່ຽວເຊບັ້ງໄຟ
ສະຖານທີ່ທ່ອງທ່ຽວທ່າຝຣັ່ງ
ສະຖານທີ່ທ່ອງທ່ຽວຖໍ້າພະອິກ
ສະຖານທີ່ທ່ອງທ່ຽວຖໍ້າພະປາຜາ
ສະຖານທີ່ທ່ອງທ່ຽວຖໍ້ານາງແອ່ນ
ສະຖານທີ່ທ່ອງທ່ຽວຖໍ້າກອງລໍ
ກໍາແພງຍັກ
ພະຍານາກຈໍາລອງໜ້າວັດນາໂບ


ສະຫງວນລິຂະສິດ© ຫ້ອງວ່າການປົກຄອງແຂວງຄຳມ່ວນ 

ທີ່ຢູ່: ບ້ານ ໂພນສະໜາມ, ເມືອງ ທ່າແຂກ, ແຂວງ ຄຳມ່ວນ ຖະໜົນ: ວຽງຈັນ. ໂທ: (856-51) 212088  ແຟັກ: (856-51) 212307