ກອງປະຊຸມເຜີຍແຜ່, ແນະນຳ, ຊຸກຍູ້ ແລະ ຕິດຕາມ ການສ້າງແຜນພັດທະນາເສດຖະກິດ-ສັງຄົມແຫ່ງຊາດແລະ ແຜນການລົງທຶນຂອງລັດ ປະຈຳປີ 2025 ຈັດຂຶ້ນໃນວັນທີ 27 ສິງຫາ 2024 ຢູ່ທີ່ແຂວງຄຳມ່ວນ ໂດຍການເປັນປະທານຂອງທ່ານ ນາງ ພອນວັນ ອຸທະວົງ ຮອງລັດຖະມົນຕີກະຊວງແຜນການ ແລະ ການລົງທຶນ, ທ່ານ ສົມສະອາດ ອຸ່ນສີດາ ຮອງເຈົ້າແຂວງຄຳມ່ວນ, ມີບັນດາຮອງເຈົ້າແຂວງ 09 ແຂວງຈາກພາກກາງ ແລະ ພາກໃຕ້, ບັນດາກົມ ຂັ້ນກະຊວງທີ່ກ່ຽວຂ້ອງເຂົ້າຮ່ວມ.

ກອງປະຊຸມ ແມ່ນໄດ້ຮັບຟັງການເຜີຍແຜ່ ຄຳສັ່ງ ຂອງທ່ານນາຍົກລັດຖະມົນຕີ ແລະ ຄໍາແນະນຳຂອງກະຊວງແຜນການ ແລະ ການລົງທຶນ ກ່ຽວກັບການສ້າງແຜນພັດທະນາເສດຖະກິດ-ສັງຄົມແຫ່ງຊາດ ແລະ ແຜນການລົງທຶນຂອງລັດ ປະຈຳປີ 2025 ພ້ອມທັງ ການລາຍງານສະພາບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈຳປີ 2025 ແລະ ການສ້າງແຜນລົງທຶນ ປະຈຳປີ 2025 ຂອງບັນດາ 09 ແຂວງ ທີ່ເຂົ້າຮ່ວມ ປະກອບມີ: ນະຄອນຫຼວງວຽງຈັນ, ໄຊສົມບູນ, ບໍລິຄໍາໄຊ, ຄຳມ່ວນ, ສະຫວັນນະເຂດ, ຈຳປາສັກ, ສາລະວັນ, ອັດຕະປື ແລະ ເຊກອງ. ທ່ານ ນາງ ພອນວັນ ອຸທະວົງ ໄດ້ກ່າວມີຄໍາເຫັນ ໃນໂອກາດເປີດກອງປະຊຸມດັ່ງກ່າວວ່າ: ຈຸດປະສົງຂອງກອງປະຊຸມຄັ້ງນີ້ ແມ່ນເພື່ອຊຸກຍູ້, ແນະນຳ ຈິດໃຈຕົ້ນຕໍຂອງລັດຖະບານ ໃນການສ້າງແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ ປະຈຳປີ 2025, ແຜນພັດທະນາຂອງຂະແໜງການໃນທ້ອງຖິ່ນ ປະຈຳປີ 2025 ໃຫ້ມີຄວາມເປັນເອກະພາບ ໄປໃນທິດທາງດຽວກັນ, ຮັບປະກັນໄດ້ຄາດໝາຍ, ວຽກງານຈຸດສຸມຂອງລັດຖະບານ ໄດ້ຮັບການຈັດຕັ້ງປະຕິບັດ ຢ່າງມີຜົນສຳເລັດສູງຕາມແຜນການທີ່ວາງໄວ້. ພ້ອມກັນນີ້ ຍັງໄດ້ຮຽກຮ້ອງມາຍັງທ່ານທີ່ເຂົ້າຮ່ວມ ຈົ່ງພ້ອມກັນປະກອບຄຳຄິດຄຳເຫັນ ຢ່າງກົງໄປກົງມາ ດ້ວຍຄວາມຮັບຜິດຊອບສູງ ເພື່ອເປັນພື້ນຖານໃນການສ້າງແຜນພັດທະນາເສດຖະຖິດ-ສັງຄົມແຫ່ງຊາດ ແລະ ແຜນການລົງທຶນຂອງລັດ ປີ 2025 ໃຫ້ມີຄວາມສອດຄ່ອງກັບສະພາບການພັດທະນາໃນໄລຍະໃໝ່, ເປັນແຜນທີ່ສາມາດຈັດຕັ້ງປະຕິບັດໄດ້ຢ່າງມີປະສິດທິຜົນ ແລະ ສຳເລັດທັນກຳນົດເວລາ.